Af gangnagerð

Með tímanum ætti að gera göng um Súðavíkurhlíð. Slíkt mætti vera framar á forgangslista stjórnvalda. Fremst á verkefnalista þeirra yfir ný jarðgöng hérlendis ættu  - ásamt göngum um Súðavíkurhlíð - að vera Dýrafjarðargöng, göng undir hálsana í Austur - Barðastrandarsýslu, Norðfjarðargöng og ný Hvalfjarðargöng (þó ekki endilega í þessari röð). Vaðlaheiðargöng ættu vissulega að skipa aftasta sætið enda eru þau ekki með brýnustu framkvæmdum í vegamálum.

Súðavíkurhlíð lokað

Afleitt ástand

Getur Alþingi ekki gert eitthvað í þessu? Ég held að lögreglan hafi ekki tiltækan mannskap til að sinna þessu verkefni að einhverju viti. Um daginn sá ég bifreið sem átti að skoða árið 2005. Þá veit ég um aðra sem átti að skoða 2006. Skelfilegt er að þessi mál skuli ekki hafa verið í meiri forgangi hjá lögreglunni en raun ber vitni.

7.024 ökutæki ótryggð

Hvað gera menn þá?

Við þurfum að finna upp gáma sem leka ekki. Ég trúi ekki að það sé mjög flókið enda lifum við á tímum þar sem hægt er að græða nýtt hjarta í fólk. Við verðum að læra af þessu til að fyrirbyggja að svona gerist ekki aftur.

Ómetanleg listaverk eyðilögðust

Reykjanesfólkvangur in Memoriam?

Ég, fyrir hönd náttúruverndarsinna í nútímanum og fjölmargra Íslendinga í framtíð og fortíð, mótmæli hér með öllum virkjunum í Reykjanesfólkvangi.  Þetta svæði er einstakt þótt víða væri leitað út frá menningarsögu og jarðmyndunum. Við Íslendingar eigum að sýna þessum fólkvangi þá virðingu sem honum ber en það hefur ekki verið gert fram að þessu, sbr. náttúruníð vegna námugraftar og umgangs orkufyrirtækja og utanvegaakstur á svæðinu. Í raun ætti að gera þetta núverandi útivistarsvæði allra á suðvesturhorninu að þjóðgarði sem yrði á margan hátt einstakur og á heimsmælikvarða. Við lifum á breyttum tímum eftir 2007. Umræða um umhverfis- og náttúruvernd er hvarvetna í fjölmiðlum og í nútímaumræðu og að mínu mati er það nokkuð 2007 að ætla með frekju gagnvart þúsundum útivistarfólks og annarra hagsmunaaðila að eyðileggja þetta mjög svo fallega svæði. Ef við virkjum þarna þá mun loftmengun vegna brennisteinsvetnis liggja yfir svæðinu með takmörkuðum útivistarmöguleikum. Þá mun mosi á nærliggjandi svæðum eyðileggjast. Við vitum lítið um áhrif jarðvarmavirkjana til framtíðar, t.d. með tilliti til jarðskjálfta. Hefur til að mynda verið leitað álits hjá Grindvíkingum vegna hugsanlegra jarðskjálfta á svæðinu? Við þekkjum afleiðingar jarðhræringa vegna niðurdælingar vatns á Hellisheiði á byggðina og íbúa í Hveragerði og þær afleiðingar sem sú virkjun hefur haft á það blómlega útivistarsvæði sem áður var á Hellisheiði en er nú ekki svipur hjá sjón. Við eigum nóg af annars konar orku en jarðvarma sem við ættum að virkja, t.d. metan í fjóshaugum sveitabýla hringinn í kringum landið og í ruslahaugum, nóg af vindi sem gæti knúið áfram vindmyllur og síðast en ekki síst er hægt að virkja brimið og sjávarföllin. Ef við notum þessa orkugjafa sem ég mæli hér með, yrði það vonandi í sátt við Guð og menn. Reykjanesfólkvangur er útivistarsvæði til margra áratuga og náttúruperla — sem ég ber miklar taugar til — en ekki iðnaðarsvæði.

Skalli í frásögn

Ég hefði nú kosið að vita hvort sjúkraskrár á heilsugæslustöðinni í Drápuhlíð hafi eyðilagst. Þá er tjónið ómetanlegt. Þessar upplýsingar hefðu mátt fylgja fréttinni enda mikilvægt atriði.

Mikið tjón í Drápuhlíð

Innkaupakerrur á víðavangi

Mikill ófögnuður eru allar þessar innkaupakerrur sem dregnar eru frá verslunum og eru svo skyldar eftir hingað og þangað um borgina. Mér finnst þetta eins og hver annar þjófnaður og tel að það eigi að sekta fólk sem þetta gerir, enda má varla fjarlægja kerrur út fyrir verslunarlóð og draga að heimilum sínum án leyfis. Tapaðar kerrur hækka væntanlega verð í verslunum og því er þetta alvarlegt mál — svo ekki sé nú talað um sjónmengunina og slysahættuna sem af þessum kerrum stafar, t.d. fyrir börn og unglinga sem leika sér gjarnan að þeim. Fólk á öllum aldri gerir þetta og finnst mér það ekki til eftirbreytni. Amen.

Lýsi er ekki hollt eða hvað?

Ef E-vítamín getur aukið hættuna á að fá krabbamein í blöðruhálskirtil þá segir sig sjálft að Lýsi er ekki hollt enda E-vítamín í því. Hvað á maður þá að gera? Fara í Bónus og kaupa sér snakk?

Eykur líkur á blöðruhálskrabba

Hvað skal gera í stöðunni?

Með því að leyfa fólki að leggja bifreiðum sínum á grasi minnkum við umfang grasbletta í borginni en borgin stefnir að því að fækka grasblettum hér í borg. Grasið breytist í drullusvað öllum til ánægju og þar með verður minna um frjókorn í andrúmsloftinu. Nei, nei ég segi svona. Er mönnum nokkur vorkunn að leggja í bílastæði, taka strætó, hjóla eða ganga? Fólk hefur verið að tala um að það sé ekki nóg af bílastæðum við íþróttaleikvanga. Ég veit ekki hvort það er bara ég sem sé það en ég sé alltaf nóg af bílastæðum. Hitt er annað mál að fólk nennir oft á tíðum ekkert að hreyfa sig og ganga smá spöl. Enda er þjóðin að fitna.

Geta leyft bílastæði á grasi

Fésbókin og Vefurinn eru takmarkaðar auðlindir

Fésbókin er mikil gullnáma fyrir notendur en þessu samskiptaforriti fylgja líka gallar, ókostir sem fólk talar ekki mikið um. Þá er ég að vísa til þess að þessi samskiptasíða er mjög plássfrek í Netþjónabúum úti í heimi sem eru nánast að öllu leyti knúin áfram með olíu, kolum, kjarnorku og gasi. Ég held að fólk geri sig ekki fullkomlega grein fyrir því hvað Vefurinn er óhliðhollur umhverfinu, ekki síst síða eins og Fésbókin en engin síða á Vefnum hefur þörf fyrir eins mikla orku enda eru notendur síðunnar tæplega 700 milljónir (voru 50 milljónir árið 2007 og 500 milljónir 21. júlí 2010). Þess vegna er mikilvægt að fólk fari í vissar mótvægisaðgerðir, eyði út tölvupóstum af tölvupóstföngum sínum reglulega (prenta tölvupóstinn út ef hann er merkilegur) og hafi það fyrir sið að taka út efni af vegg Fésbókarinnar en allt sparar þetta pláss í Netþjónabúum. Ég hef spáð því í einrúmi en finnst allt í lagi að spá því hér með opinberlega að síða eins og Fésbók verði ekki til eftir nokkur ár nema til komi ný tækni og aðrir og umhverfisvænni orkugjafar verði útbreiddari en þeir sem nú eru aðallega notaðir. Við getum ekki leyft okkur þann munað að hlaða sífellt meira efni inn á Vefinn. Við verðum að taka eitthvað út líka. Gróðurhúsaáhrifin og alþjóðlegar skuldbindingar í umhverfismálum munu stöðva framþróun Vefjarins.

Ég spái því einnig að mörg gögn sem við teljum örugg á Vefnum t.d. tölvupóstar, myndir, blogg og fleira muni tapast einn daginn. Ekki þarf nema stríð eða netárásir til að svo gerist, eða náttúruhamfarir ýmis konar, til að mynda flóð úti í heimi eins og við fengum reglulega fréttir af í vetur. Þegar ég fór að velta þessu fyrir mér fyrir ekki svo löngu tók ég þá ákvörðun að ég myndi prenta út upplýsingar af vegg Fésbókarsíðu minnar reglulega. Þá prentaði ég jafnframt alla merkilega og mikilvæga tölvupósta sem ég átti í mínum fórum, sem spönnuðu tímabilið 2007 til dagsins í dag, og setti í kassa og fór með á Þjóðskjalasafn. Þar skrifaði ég undir samning þess efnis að engin muni komast í gögnin fyrir utan mig þegar ég þarf á því að halda. Svo mun verða þar til eftir minn dag þegar efnið verður gert aðgengilegt fyrir aðra samkvæmt vilja mínum. Pappír er talinn ein endingarbesta aðferðin til að varðveita gögn nú um stundir. Með þessu slæ ég í raun tvær flugur í einu höggi: Ég er þó nokkuð umhverfisvænn með þessu móti (það að prenta út tölvupósta þarf ekki endilega að fela í sér alslæm umhverfisáhrif eins og ég hef komið inn á sbr. slæm umhverfisáhrif Netþjónabúa) og tryggi varðveislu gagna um langa framtíð. Eða þrjár flugur í einu höggi: Með þessu móti kem ég líka e.t.v. í veg fyrir að óprúttnir aðilar geti lesið tölvupóstana. Það geta þeir gert með því að brjótast inn í tölvupóstfang mitt eða með því að komast yfir lykilorð mitt. Eins getur vel verið að þeir sem hýsa tölvupóst minn á Netinu lesi hann og safni þannig upplýsingum um mig sem þeir geta svo sýslað með. Það er nefnilega þekkt að fyrirtæki úti í heimi stundi gagnasöfnun um fólk (ekki eingöngu Wikileaks ef fólk skyldi halda það!). Slíkt er auðvitað freistandi fyrir fyrirtæki, enda er þvílíkt magn upplýsinga um fólk á Vefnum t.d. á Fésbókinni. Kannski er Fésbókin aðeins dulbúin sem samskiptasíða. Ef til vill er hún fyrst og seinast gagnagrunnur sem safnar persónuupplýsingum sem kemur sér vel fyrir suma í ýmsum tilgangi og sumum miður góðum.

Ekki beint skemmtilegt

Þetta er enn eitt mengunarhneykslið hérlendis sem kemst í fréttirnar og það með stuttu millibili. Hvert erum við að stefna í umhverfismálum? Nú verðum við að fara að spýta í lófana og knýja á um úrbætur. Ímynd Vestfjarða sem hreins landsvæðis, hefur beðið hnekki.

Mengun í Ísafjarðarhöfn